Gwamnan Jihar Katsina, Malam Dikko Umaru Radda, ya sanar da shirin gina kamfanin sarrafa magani na farko mallakin gwamnati a Arewacin Najeriya, tare da zuba jari mai yawa domin inganta kiwon lafiya a jihar.
Gwamnan ya kuma ce an ware sama da Naira biliyan 5 don ayyukan kiwon lafiya, ciki har da gina sabbin gine-gine, tallafin karatun likitoci.
Gwamna Dikko Radda ya bayyana haka ne da yake jawabi yayin kaddamar da sabuwar ma’ajiyar magunguna ta zamani da kuma raba babura kyauta ga jami’an kiwon lafiya a hukumar kula da raba magani ta jihar Katsina.
Gwamna Radda ya ce wannan na daga cikin matakan da gwamnatin ke dauka domin bunkasa samar da magunguna a gida da rage dogaro da kasashen waje.
A yayin da take jawabi Shugabar Hukumar Kula da Magunguna da Kayayyakin Lafiya ta Jihar Katsina Pharm. Fatima Shuaibu,, ta ce an tanadi dukkan abubuwan da suka kamata domin samar da ingantattun magunguna ga al’umma.
Daga nan shugabar ta bayyana godiya ga Gwamnan bisa goyon bayan da yake baiwa hukumar.